مشكلة الاكتئاب؛ وأسبابها وكيف نستطيع تجنبها قدر الإمكان

مشكلة الاكتئاب (depression problem)؛ من منا غير مكتئب؟ ومن منا لم يمر بفترة اكتئاب وظن أنها النهاية؟ ولكن شكل الاكتئاب ودرجته بتختلف من شخص للآخر، وأسبابه برده بتختلف. فيه اللي بيكتئب بسبب مشاكل أسرية، وفيه اللي بيكتئب بسبب موت شخص مقرب منه، وفيه اللي بيكتئب بسبب مشاكل زوجية أو انفصلل. تعددت الأسباب والمسببات ولكن النتيجة واحدة وهي بئر عميق من الألم والحزن والهم والغم اللي بدون سبب مباشر، وانعدام الرغبة في عمل أي شيء.

أسباب مشكلة الاكتئاب

أسباب مشكلة الاكتئاب بتختلف من شخص للتاني، ومنقدرش نلوم حد أو نقلل من السبب اللي أدى إلى إصابته بالاكتئاب، المهم لازم تعرف تتعامل مع الاكتئاب وتتعايش معاه وتكمل حياتك لأنك لو استسلمت هيكون الوضع صعب.

• هل للاكتئاب سبب عضوي؟

غالبا أيوة بيبقى فيه سبب عضوي وخاصة في الحالات الشديدة واللي الأعراض بتاعتها بتبقى جامدة، أو بيبقى فيه استعداد جسدي للإصابة بالاكتئاب. أغلب الحالات بيبقى السبب هو ضغوط الحياة ومشاكلها وقسوة الأهل والظروف إلى آخره، ولكن فيه اللي جسمه بيستحمل وفيه اللي بيتعب بسرعة، وفيه اكتئاب ما بعد الولادة وده بيحصل كتير وبتبقى أعراض نفسجسدية واكتئاب ما بعد الولادة غالبًا مش بيطول يعني فترة مؤقتة وبيخف.

• هل الاكتئاب ممكن يكون بسبب سحر أو عين أو حسد؟

أيوة ممكن طبعا لأن الدين اتكلم على إن الحاجات دي ممكن تؤثر نفسيًا في أي حد، ولو أخذناها من ناحية علم الطاقة فالطاقة السلبية للحسد أو السحر أو غيرها تؤثر سلبا على جسم الإنسان ونفسيته وكيمياء المخ، وعشان كدا الدين أوصانا بأذكار الصباح والمساء وغيرها من التحصينات اللي بيحصن الإنسان بيها جسمه وروحه.

• هل الأطفال بيجيلهم اكتئاب؟

الاكتئاب بييجي لكل الناس وفي كل الأعمار، الاكتئاب موجود عند المراهقين، والأطفال بيكون زيهم زي الكبار بيصابوا بالاكتئاب، وغالبًا السبب بيبقى مشاكل أسرية، أو التنمر، أو غيره من الأسباب اللي بتخلي الطفل ينعزل ويتأخر دراسيًّا. أيضًا الاكتئاب بيصيب الراجل والست، والغني والفقير، والأعزب والمتزوج، كلنا معرضون للاكتئاب في كل مراحل حياتنا.

“اطلع على: أسباب الاكتئاب“

إزاي ممكن أتفادى الإصابة بالاكتئاب؟

الموضوع مش بالسهولة دي، ولكن لازم الإنسان يكون عنده رضا ويكون متقبل لكل حاجة بتحصل في حياته، ويكون قوي في مواجهة مشاكل الحياة، وإنه يقرأ ويعرف أكتر عن الاكتئاب والصحة النفسية عمومًا، وإنه يؤدي عباداته ويخليه دايمًا قريب من ربنا، الحاجات دي وغيرها مهمة في جعل الإنسان قويًّا في مواجهة نوبات الاكتئاب.

“قد يهمك: متلازمة المحتال“

الأعراض النفسجسدية

هي مجموعة من الأعراض الجسدية اللي بتظهر بسبب الحالة النفسية السيئة للإنسان ولا يوجد لها تفسير طبي، زي القولون العصبي مثلًا، أو تساقط الشعر، أو زيادة ضربات القلب بدون سبب طبي، أو ظهور بقع بنية اللون على الجلد، كل دي أعراض جسدية بتصيب الإنسان (Human) في حالة اعتلال حالته النفسية.

علاج مشكلة الاكتئاب

هنا سؤال مهم هل الأدوية هي الحل؟ والجواب هو لا. الأدوية جزء من الحل مش الحل كله، والأدوية بتعالج الأعراض مش بتعالج المرض، الأدوية مهمة جدًا في الاكتئاب الحاد، ولما بنقول الاكتئاب الحاد نقصد بيه الاكتئاب اللي بيطير النوم من عينك واللي يخليك متروحش الشغل، واللي يعطل حياتك تمامًا.

مشكلة الأدوية النفسية هي الأعراض الجانبية بتاعتها، فهي بتسبب أعراض مقلقة أحيانًا خاصةً مع الجرعات العالية؛ مثل: جفاف الفم، الدوار، الهمدان، رعشة الأطراف، زيادة الوزن. أي حد بيقرر إنه يأخذ دواء نفسي بيقارن بين الأعراض الجانبية اللي ممكن تحصل لما يأخذ الأدوية والأعراض النفسية اللي بتحصل لو مأخدش الدوا. لو الإنسان لقي إنه مش هيقدر يستحمل الحياة مع الأعراض النفسية والتعب النفسي فبيستحمل الأعراض الجانبية للدواء.

العلاج بيشمل الناحية السلوكية والناحية الاجتماعية والدينية، يعني باختصار حياتك كلها لازم تترتب من جديد وتتنظم عشان تقدر تعدي المشكلة دي وتواجه اكتئابك وتتعايش معاه ويبقى ليك أحلام عاوز تحققها رغم إن الدنيا سودا قدامك ولكن لا تيأس.

“قد يهمك: التغلب على الاكتئاب بدون أدوية، وقد يهمك: انتحار مريض الاكتئاب“

أعراض مرض الاكتئاب

أعراض مشكلة الاكتئاب مختلفة ومتنوعة، وده لأن الاكتئاب بيظهر بأشكال مختلفة عند مختلف الأشخاص، على سبيل المثال: قد تظهر أعراض مشكلة الاكتئاب لدى الشخص اللي عمره 25 سنة بشكل مختلف عن تلك الأعراض اللي تظهر عند شخص تاني عمره 70 سنة. كمان قد تظهر لدى بعض الأشخاص المصابين بمرض الاكتئاب أعراض تكون حادة جدًا إلى درجة واضحة تقول إن فيه حاجة غلط في الشخص ده، وقد يشعر أشخاص آخرون بأنهم مساكين بشكل عام، أو بأنهم مش سعداء بدون معرفة سبب ده.

بشكل عام تشمل أعراض مشكلة الاكتئاب التالي:

• فقدان الرغبة في القيام بالأعمال والمهام اليومية الاعتيادية.
• الإحساس بانعدام الأمل.
• الإحساس بالعصبية والكآبة.
• وجود نوبات من البكاء دون أي سبب ظاهر.
• صعوبات في التركيز.
• اضطرابات في النوم.
• عصبية.
• صعوبات في اتخاذ القرارات.
• قلق وضجر.
• زيادة أو نقصان الوزن بدون قصد.
• قلق وضجر.
• حساسية مفرطة.
• إحساس بقلة القيمة.
• لدى المتزوجين بيكون فيه فقدان رغبة في ممارسة الجماع.
• إحساس بالتعب أو الوهن.
• مشكلات جسدية بدون أي تفسير لها، وذلك مثل:أوجاع الظهر أو الرأس.
• أفكار انتحارية أو محاولات للانتحار بالفعل.

تعرفنا في هذه المقالة المختصر على مشكلة الاكتئاب “depression problem”، وأسبابها، وكيف نستطيع تجنبها قدر الإمكان، وعرفنا أن الاكتئاب موجود عند الأطفال والمراهقين، وعرفنا كيف تتحول الأعراض النفسية إلى أعراض جسدية، وكيف يمكن علاج هذه المشكلة، كما تعرفنا على 17 عرض عام لهذا المرض الخطير. في النهاية يجب إدراك أهمية استخدام العلاج السلوكي والمعرفي والديني بجانب العلاج الدوائي.